خیبرپختونخوا : مختلف شعبوں میں ڈرون ٹیکنالوجی متعارف کرانے کا فیصلہ

خیبرپختونخوا حکومت کا مختلف شعبوں میں ڈرون ٹیکنالوجی متعارف کرانے کا فیصلہ۔

صوبائی حکومت نے پولیس، زراعت، معدنیات اور ریسکیو کے شعبوں میں ڈرون ٹیکنالوجی متعارف کرانے کا فیصلہ کیا ہے۔
پشاور: وزیر اعلیٰ محمود خان نے منصوبے پر عملدرآمد کی منظوری دے دی ہے۔

 اس حوالے سے ایک بریفنگ میں بتایا گیا کہ منصوبے کا ابتدائی تخمینہ لاگت 500 ملین روپے ہے۔ پہلے مرحلے میں ڈویژنل ہیڈکوارٹرز سے منصوبے کا اجراء کیا جائے گا۔
وزیر اعلیٰ کا  محمود خان کا کہنا ہے کہ ڈرون ٹیکنالوجی سے پولیس کی آپریشنل اور تفتیشی صلاحیتوں میں بہتری آئے گی۔
ڈرونز کے ذریعے پٹرولنگ سے پولیس اہلکاروں کی جانوں کو محفوظ کیا جا سکے گا۔ڈرونز کے ذریعے ریسکیو آپریشنز میں بھی خاطر خواہ بہتری ممکن ہو گی۔ منصوبہ مؤثر پولیسنگ کی طرف اہم سنگ میل ثابت ہوگا۔
وزیراعلی کی پہلے مرحلے میں محکمہ پولیس اور پی ڈی ایم اے میں ڈرون ٹیکنالوجی کے استعمال کی ہدایت۔ دوسرے مرحلے میں منصوبے کو معدنیات،زراعت اور دیگر شعبوں تک توسیع دی جائے۔

ایڈورڈز کالج کے طلبہ ٹریفک رضا کار فورس میں شامل

پشاور: ایڈورڈز کالج کے طلباء و طالبات سٹی ٹریفک پولیس پشاور کے ٹریفک رضا کار فورس میں شامل ہو گئے اس سلسلے میں گزشتہ روز ایڈورڈز کالج پشاور میں ایک تقریب کا انعقاد کیا گیا جس میں چیف ٹریفک آفیسر عباس مجید خان مروت‘ پرنسپل شجاعت علی خان، ڈی ایس پی انیلہ ناز اور دیگر ٹریفک حکام بھی موجود تھے۔

چیف ٹریفک آفیسر عباس مجید خان مروت نے ایڈورڈز کالج کے طلباء و طالبات کی فورس میں شمولیت کو خوش آئند قرار دیتے ہوئے کہا کہ اس سے فورس مزید مضبوط ہو گی اور زیادہ سے زیادہ لوگوں کو ٹریفک قوانین سے متعلق آگاہی دی جا سکے گی۔ چیف ٹریفک آفیسر عباس مجید خان مروت نے تقریب کے دوران ٹریفک رضا کار فورس میں شامل ہونے والے طلباء و طالبات میں سٹی ٹریفک پولیس پشاور کے شرٹس بھی تقسیم کئے۔ چیف ٹریفک آفیسر عباس مجید خان مروت نے کہا کہ ٹریفک قوانین سے متعلق شہریوں میں آگاہی پیدا کرنا ناگزیر ہے کیونکہ زیادہ تر لوگ ٹریفک قوانین سے نا خبر ہیں جن کو آگاہی دے کر ہی ٹریفک مسائل اور ٹریفک حادثات کو روکا جا سکتا ہے۔

انہوں نے کہا کہ سٹی ٹریفک پولیس پشاور کی جانب سے طلباء و طالبات پر مشتمل رضا کار فورس کی تشکیل کا مقصد شہریوں کو ٹریفک قوانین سے آگاہ کرنا ہیں۔ انہوں نے کہا کہ رضا کار فورس کے ممبران شہریوں کو شہر بھر میں لین لائن ڈسپلن ‘ زیبرا کراسنگ ‘ سیٹ بیلٹ ‘ ہیلمٹ اور ون ویلنگ سمیت دیگر ٹریفک قوانین بارے آگاہی دینگے۔ انہوں نے کہا کہ سٹی ٹریفک پولیس پشاور کی جانب سے شہر بھر میں شہریوں کو ٹریفک کی روانی سے متعلق آگاہی دینے کا سلسلہ جاری ہے جبکہ ایڈورڈز کالج کے طلباء و طالبات فورس میں شامل ہونے کے بعد یہ سلسلہ مزید تیز ہو جائیگا اور زیادہ سے زیادہ لوگوں کو ٹریفک قوانین بارے آگاہ کیا جائے گا۔

انہوں نے کہا کہ سٹی ٹریفک پولیس پشاور شہریوں کو سفری سہولیات فراہم کرنے سمیت ٹریفک قوانین پر عملدرآمد یقینی بنانے کے لئے تمام تر صلاحیتیں بروئے کار لائے گی۔ رضا کار فورس کے ممبران شہر کے بازاروں میں تاجروں کو تجاوزات کے خاتمے کے بارے میں بھی آگاہی دینگے تاکہ شہر میں کسی قسم کی ٹریفک جامنگ کا مسئلہ درپیش نہ ہو۔ بعدازاں ایڈورڈز کالج کے حکام اور ٹریفک پولیس حکام میں شیلڈز تقسیم کئے گئے اور چیف ٹریفک آفیسر عباس مجید خان مروت نے ایڈورڈز کالج کے پرنسپل شجاعت علی خان کو شیلڈ پیش کیا.

اپر کرم، پاک افغان گرینڈ جرگہ کا انعقاد

اپرکرم کیساتھ منسلک پاک افغان سرحد گوی بارڈر پر سرکاری سطح پر گرینڈ جرگہ منعقد ہوا۔

حکومتی سطح پر دونوں ملکوں میں تجارت و بارڈر سیکورٹی اور دیگر امور پر تفصیلی گفتگو ہوئی پاکستان سے چیئرمین ملک شہید گل جاجی،ملک ملنگ خان جاجی،ملک بسم اللہ جان،ملک خاندان،ملک رؤف،ملک دیدار،ملک زاخیل،ملک نور محمد جاجی ،اور افغانستان سے جاجی قوم کے مشران ملک جاجی ولی جاجی ،ملک جاجی حق یار،ملک جاجی مدیر اکبر،ملک جاجی صدیقی جاجی و دیگر نے شرکت کی۔

شرکت کرنے والے جرگہ ممبران نے گوی بارڈر کو کھولنے سے دونوں اطراف کے عوام کی اہم ضرورت قرار دیا جس سے دونوں ملکوں میں تجارت کو فروغ ملے گا اور بارڈر کے آس پاس غریب عوام کو روزگار کی فراہمی ممکن ہو گی اور علاقہ میں امن اور ترقی کا دور شروع ہوگا یاد رہے جاجی قوم کے مشران جو بارڈر کے دونوں اطراف سے شرکت کر رہے ہیں امن و امان میں جاجی قوم اہم کردار ادا کر رہے ہیں جس پر پوری قوم کو فخر ہے ۔

FdBrdF8X0AEyB2b

پاکستان-انگلینڈ ٹی ٹوئنٹی سیریز کا پہلا میچ آج کھیلا جائے گا

پاک انگلینڈ ٹی ٹوئنٹی سیریز کا پہلا میچ آج کھیلا جائے گا

پاک انگلینڈ سیریز کا پہلا میچ آج نیشنل اسٹیڈیم کراچی میں پاکستانی وقت کے مطابق شام ساڑھے 7 بجے شروع ہوگا۔

انگلینڈ ٹیم کے کپتان جوز بٹلر انجری کے باعث میچ میں شرکت نہیں کریں گے۔ ان کی جگہ معین علی انگلش ٹیم کی قیادت کریں گے۔

 سات ٹی ٹوئنٹی میچز کی سیریز کے چار میچز کراچی اور تین لاہور میں ہوں گے۔ گزشتہ روز سیریز کی ٹرافی کی رونمائی بھی کی گئی۔

35160230-a054-4f03-af64-bb8f1ab885d9

تحصیل ماموند: امن والی بال ٹورنامنٹ اختتام پزیر

باجوڑ سکاؤٹس بریگیڈ کے زیرانتظام تحصیل ماموند میں امن والی بال ٹورنامنٹ کا فائنل کھیلا گیا

فرنٹیئر کور نارتھ ،باجوڑ سکاؤٹس بریگیڈ کے زیرانتظام تحصیل ماموند کے علاقے مینہ میں امن والی بال ٹورنامنٹ کا فائنل کھیلا گیا ۔فائنل میچ شاگو الیون اور ترخو الیون کے درمیان کھیلا گیا.

اس موقع پر وینگ کمانڈر اور ناظم اعلیٰ ڈاکٹر خلیل الرحمن نے کھلاڑیوں میں انعامات تقسیم کئے اور کھلاریوں کے جذبہ کو سراہا ۔

یہ ٹورنامنٹ یوتھ آف باجوڑ کے تعاون سے 2 سے 18 ستمبر تک کھیلا گیا جس میں کل 14 ٹیموں نے حصہ لیا ۔

7b1d8f4a-fd5c-4de6-ba1e-6294a2771395

شمالی وزیرستان کے مسائل کو حل کرنے کے لیئے جرگہ کا انعقاد

شمالی وزیرستان کے مسائل کو حل کرنے کی خاطر جی او سی شمالی وزیرستان میجر جنرل محمد نعیم اختر کی زیرِ صدارت آج ایک اہم جرگہ منعقد ہوا جس میں شمالی وزیرستان کے تمام ملکان و مشاران کو ظہرانے پر مدعو کیا گیا جرگے میں سول انتظامیہ بشمول ڈی سی اور ڈی پی او نے بھی شرکت کی.
جی او سی میجر جنرل نعیم اختر نے اس موقع پر کہا کہ وزیرستان کی سر زمین میں امن ریاستی مشینری اور عوام کے یکجا ہو کر کام کرنے میں ممکن ہے.وزیرستان کی عوام کی فلاح و بہبود اور بنیادی ضروریات پوری کرنے کیلئے دو اہم اہداف کا حصول لازم ہے، جن میں تعلیم اور روزگار شامل ہیں. ان دونوں اہداف کے حصول کے لیے خاطرخواہ کام ہو رہا ہے.

 انھوں نے بتایا کہ وزیرستان کے 400 بچوں کو تعلیم کے حصول کیلئے ملک بھر میں اے پی ایس سکولز میں بھیجا گیا ہے. اس کے علاوہ شمالی وزیرستان میں 4 ہاسٹلز کا قیام عمل میں لایا گیا ہے جس میں مستحق بچوں کو مفت رہائش، کھانا اور تعلیم دی جائے گی. ان ہاسٹلز میں تقریباً 500 بچوں کے رہنے کا انتظام ہو گا.
اسکے علاوہ دتہ خیل میں سکول کا قیام، بویا میں ایک سکول کی منظوری،WITE نورک اور WVTC میران شاہ میں ووکیشنل ٹریننگ بھی انہی پراجیکٹس کی ایک اہم کڑی ہے.

روزگار کے مواقع فراہم کرنے کے لیئے غلام خان سے 100  گاڑیوں کی بجائے اب 400 گزرتی ہیں اور غلام خان سے لیکر میر علی تک منڈیوں کا قیام ہوگا.
شیوا میں گیس دریافت ہوئی ہے جس میں عوام کی فلاح کے لیے SNGPL اور MPCL سے مذاکرات ہو رہے ہیں کہ اس پہ پہلا حق وزیرستان کی عوام کا ہے. منظر خیل میں ایک بہت بڑا پراجیکٹ شروع ہوا ہے جس میں قوم کا اچھا خاصہ حصہ منظور ہو گیا ہے.
بانڈہ پل اور میر علی سے غلام خان بائ پاس اہم ترقیاتی منصوبے ہیں.
مزید برآں TESCO سے کامیاب مذاکرات ہوئے ہیں اور جلد بجلی کے شیڈول میں بہتری آئے گی. انہوں نے حالیہ دھرنوں سے ہونے والے معاشی نقصانات کی طرف اشارہ کرتے ہوئے کہا کہ احتجاج اور دھرنا آپکا حق ہے لیکن کسی اور کے سیاسی مقاصد کیلئے خود کو نہ استعمال ہونے دیں.

پاک فضائیہ کی سیلاب سے متعلق بحالی اور امدادی کارروائیاں جاری

سربراہ پاک فضائیہ ائیر چیف مارشل ظہیر احمد بابر سدھو کی خصوصی ہدایات پر پی اے ایف بیسز اور ریجنل کمانڈز ریلیف اور بحالی کے کاموں میں بڑھ چڑھ کر حصہ لے رہے ہیں۔ پاک فضائیہ کے اہلکار سیلاب زدگان کو خوراک، رہائش، پینے کا پانی اور طبی امداد کی بنیادی ضروریات کی فراہمی کے لیے دن رات کوشاں ہیں۔ خاص طور پر پاک فضائیہ کی ایمرجنسی ریسپانس ٹیمیں سول انتظامیہ کے ساتھ خیبرپختونخوا، سندھ، بلوچستان اور جنوبی پنجاب کے سیلاب سے متاثرہ علا قوں میں ڈینگی بخار بچاؤ کی مہم میں پیش پیش ہیں ۔

پاک فضائیہ نے سیلاب متاثرین کے لیے 4853 خیمے، 416221 فوڈ پیکجز، 3203.67 ٹن راشن اور 242,824 لیٹر ) پینے کا صاف پانی فراہم کیا ہے۔ مزید یہ کہ پاک فضائیہ نے 45 میڈیکل کیمپ قائم کیے ہیں جہاں اب تک 58353 مریضوں کا علاج کیا جا چکا ہے۔ 19807 افراد کی رہائش کے لیے 20 ٹینٹ سیٹز اور 54 ریلیف کیمپ بھی قائم کیے گئے ہیں۔ پاک فضائیہ نے 257 پروازوں کے ذریعے سیلاب سے متاثرہ علاقوں میں 1521 افراد کو محفوظ جگہ پر منتقل کر دیا گیا۔

ڈینگی صورتحال، آئسولیشن وارڈز قائم

پشاور : ضلع مردان اور خیبر میں ڈینگی کے بڑھتے ہوئے خطرے کے پیش نظر آئسولیشن وارڈز قائم کردیا گیا ہے۔ ضلع مردان کے مختلف مراکز صحت میں 150 بستروں پر مشتمل آئسولیشن وارڈز قائم کردیے گئے ہیں ۔ ترجمان محکمہ صحت کت مطابق  ضلع مردان کے دو تحصیل تخت بھائی اور بابوزئی ڈینگی سے زیادہ متاثرہ ہیں۔

 تحصیل و ضلع ہیڈکوارٹرہسپتالوں سمیت مردان میڈیکل کمپلیکس میں 20 بستروں پر مشتمل تین ڈینگی مخصوص وارڈز قائم کیئے گئے ہیں اور ضلع خیبر میں بھی 50 بستروں پر مشتمل ڈینگی آئسولیشن وارڈز قائم  یہ وارڈز ٹائپ ڈی جمرود، ڈوگرہ اور ڈی ایچ کیو لنڈی کوتل میں قائم کئے گیے۔

بڈھ بیر میں مدرسے کی معلمہ قتل کیس،قاتل بہنوئی نکلا

بڈھ بیر میں مدرسے کی معلمہ کے قتل کا ڈراپ سین ہوگیا، قتل میں اس کا بہنوئی ملوث نکلا جسے پولیس نے گرفتار کرلیا، پولیس نے ملزم کی گرفتاری کی تصدیق کی ہے جس نے رشتہ کے تنازعہ پر لڑکی کو قتل کیا۔ واقعات کے مطابق تھانہ بڈھ بیر پولیس کو چند روز قبل اسرار نامی شخص نے اپنی بیٹی مسما ة(س)عمر 23/24 سال کی مبینہ گمشدگی کی رپورٹ کی تھی،متوفیہ مدرسہ میں پڑھاتی تھی جو مدرسے جانے کے بعد لاپتہ ہوگئی تھی اورتین روز بعد جمعے کی صبح اس کی مسخ شدہ نعش برساتی نالے سے برآمد کی گئی تھی ۔لواحقین نے نعش کے قریب سے ملے برقعہ سے لڑکی کی شناخت کی تھی۔

 خاتون کے قتل میں ملوث ملزم کو گرفتار کرلیا گیا ہے جو اس کا اپنا بہنوئی ہے ، ملزم کی خواہش تھی کہ متوفیہ اس کے بھائی کے ساتھ شادی کرے تاہم وہ انکاری تھی جس پر مبینہ طو رپر اس کی جان لی گئی ۔ گرفتاری کے بعد ملزم کا آج جسمانی ریمانڈ حاصل کرکے مزید تفتیش کی جائے گی۔ واضح رہے کہ واقعہ کے خلاف لواحقین اور مقامی افراد نے کوہاٹ روڈ پر احتجاج بھی کیا تھا اورملزمان کی گرفتاری کا مطالبہ کیا تھا۔