All posts by : Hayat Ullah

جنگ زدہ علاقوں میں امن کی بحالی کے بعد سب سے اہم مسلہ لینڈ مائنز ہوتا ہے۔لینڈ مائنز ایک ایسا خفیہ دشمن ہے جو نقصان دینے کے بعد ہی نمودار ہوتا ہے۔ وزیرستان میں ایک طویل اپریشن کے بعد یہاں پر بھی لینڈ مائنز کا مسلہ ایک سنگین مسلہ بن چکا ہے سیکیورٹی ادارے دہشت گردی پر قابوں پانے میں تو کامیاب ہوگئے لیکن ابھی تک لینڈ مائنز کے واقعات پر قابوں پانے میں مشکلات کا سامنا کر رہے ہیں۔اعداد وشمار کے مطابق اب تک 179لینڈ مائنز کے واقعات رونما ہوچکے ہیں جس میں 200 کے قریب  افرادلینڈ مائنز کا شکار ہوچکے ہیں اس میں ذیادہ تر تعداد بچوں کی ہے لینڈ مائنز کے شکار ہونے والے افراد میں خواتین بھی شامل ہیں ۔انسانوں کے علاوہ لاتعداد جانور بھی لینڈ مائنز کا شکار ہوچکے ہیں ۔

سیکیورٹی اداروں  کو لینڈ مائنز پر قابوں پانے میں اب تک کیوں خاطر خواہ کامیابی نہیں مل رہی اس کی  کئی وجوہات ہیں کیونکہ اپریشن کے دوران سیکیورٹی فورسز  نے جہاں پر لینڈ مائینز لگائے تھے انکا اعداد وشمار اور جگہ تو معلوم ہے ان علاقوں کی نشاندہی کے ساتھ ساتھ انکا صفایا بھی کیا گیا لیکن سب سے بڑا مسلہ دہشت گردوں کی جانب سے لگائے گئے لینڈ مائنز ہیں کیونکہ انکے نہ تو کوئی اعداد وشمار موجود ہیں اور نہ ان مقامات کی معلومات ہیں کہ کہاں پر لینڈ مائنز لگائی گئی ہیں۔ اسکے علاوہ دوسرا  بڑا مسلہ یہ ہے کہ جن دنوں وزیرستان میں ٹی ٹی پی عروج پر تھی تو ان دنوں ٹی ٹی پی کی شکل میں مستقبل میں تباہی کے عرض سے کئی ایسے غیر ملکی افراد نے بہت رازداری کے ساتھ مختلف علاقوں میں جس میں ذیادہ تر پہاڑی علاقے اور ندی نالے شامل ہیں  میں کھیلونے نما اور دیگر اقسام کے بموں کی پیوند کاری کی جسکے کئی شواہد سامنے آئے ہیں کیونکہ کئی واقعات میں لینڈ مائنز پھٹنے کے بعد جب چھان بین کی گئی تو وہ روسی ساختہ اور افغانستان میں استعمال کیے گئے کھلونا نما بموں سے مشابہت رکھتی تھیں اور یہ تاریخی لحاظ سے بھی اپریشن سے پہلے تک استعمال ہونے والے  ساخت کی بارودی سرنگیں تھیں ۔ اس کو دیکھتے ہوئے یہ کہا جاسکتا ہے کہ گناونا جرم جس نے بھی کیا اسکا مقصد دہشت گردوں یا سیکیورٹی اداروں کو نشانہ بنانا مقصد نہیں تھا بلکہ اپریشن کے خاتمے کے بعد علاقے میں واپس آنے والے عام عوام کو نشانہ بنانا مقصد تھا ۔اس کا ان کو کیا فائدہ ہوگا تو یہ ایک الگ بحث ہے ۔

 اس صورتحال میں  لینڈ مائنز پر جلد قابوں پانا سیکیورٹی اداروں کے لیے ایک چیلنج بن چکا ہے دوسری طرف ہم عوام بھی اپنی ذمہ داریوں سے پوری طرح غافل ہیں ہم لینڈ مائنز کو ریاست کی ذمہ داری سمجھتے ہیں جوکہ ایک حقیقت ہے لیکن لینڈ مائنز کے حوالے سے آگاہی حاصل کرنے اور اس کو آگے منتقل کرنے کو بھی ہم نے ریاست پر چھوڑ دیا ہے یا پھر یہ ذمہ داری غیر سرکاری تنظمیوں کے کھاتے میں ڈالی ہے جنھوں نے  لینڈ مائنز کی آگاہی کے نام پر کروڑوں روپے کے پراجیکٹ تو حاصل کیے لیکن کارکردگی صرف فوٹوسیشن تک محدود رہی ۔اگر دیکھا جائے تو اکثر لینڈ مائنز کے واقعات بچوں کے کھیلونا نما بموں کے ساتھ کھیلنے یا پھر عام افراد کی جانب سے بموں کو خود ناکارہ بنانے کی کوشش کے دوران رونما ہوئے اس لیے اگر یہ کہا جائے تو درست ہوگا کہ اکثر واقعات آگاہی نہ ہونے کے باعث ایسے واقعات میں اضافہ دیکھنے کو ملا۔ ایسی صورتحال میں ہماری ذمہ داری بنتی ہے کہ سوشل میڈیا پر لینڈ مائنز کے واقعے کے بعد ہم جو واویلا مچاتے ہیں  اگر وہی واویلا لینڈ مائنز کی آگاہی کے حوالے سے مچائیں تو اسکی وجہ سے کئی معصوم بچوں کی جانیں بچ سکتی ہیں ۔

 اب تو یہ واویلا صرف سوشل میڈیا تک بھی محدود نہیں رہا بالکہ لینڈ مائنز کے شکار ہونے والے بچوں کی لاشوں کو احتجاجی طور پر رکھ کر حکومت سے لینڈ مائنز کی صفائی کے مطالبات کیے جارہے ہیں لیکن مجال ہے کہ ان احتجاجوں میں شامل ہونے والے لمبی لمبی تقریریں جھاڑنے والوں نے لینڈ مائنز سے آگاہی اور احتیاطی تدابیر کے حوالے سے ایک بات بھی کی ہو۔

لینڈ مائنز کے متاثرہ افراد کے لیے حکومت جو پیکج دے رہی ہے وہ بھی آٹے میں نمک کے برابر ہے اور اس پیکج کے حصول کے لیے جو طریقہ کار بنایا گیا ہے وہ لینڈ مائنز کے متاثرہ افراد کو امداد ملنے میں بہت بڑی رکاوٹ ہے۔ لینڈ مائنز کے حوالے سے بڑی رکاوٹ ہے۔ ریاست کو چاہیے کہ وقتا فوقتا لینڈ مائینز کے حوالے سے آگاہی مہم چلائے جس میں مقامی لوگوں سمیت لینڈ مائنز کے متاثرہ افراد  کو شامل کیا جائے کیونکہ یہ بات مشاہدے میں آئی ہے کہ جب بھی آگاہی کمپین چلائی گئی تو اس سال ان واقعات میں کمی دیکھنے کو ملی ہے لیکن جب اسے نظر انداز کیا گیا یا یہ کہہ کر بند تو لوگ بھی اس خطرناک چھپے دشمن کو بھول جاتے ہیں اور جب لینڈ مائنز کا کوئی واقعہ ہوتا ہے تو کچھ دنوں کے لیے تو احتیاطی تدابیر پر عمل کیا جاتا ہے لیکن آہستہ آہستہ  پھر انکو بھلا دیا جاتا ہے ۔

 لینڈ مائنز کی صفائی پر کام تیز کیا جائے مقامی نوجوانوں کو لینڈ مائنز کی صفائی کے لیے بھرتی کیا جائے  اسے ٹریننگ دی جائے ہر تحصیل سطح پر ٹیمیں بنائی جائیں ۔لینڈ مائنز سے متاثرہ افراد کی تعلیم وتربیت اور انکے لیئے فوری طور پر نوکری کا بندوبست سمیت ان افراد میں تکینکی صلاحیت پیدا کرنے کے لیے خصوصی مراکز بنائے جائیں ۔لینڈ مائنز کے متاثرہ افراد کو معاوضے دینے کے طریقہ کار کو آسان بنایا جائے ۔

مولانا فضل الرحمن کا پی ٹی ایم کو دہشت گرد جماعت قرار دینا پختون قوم کو ایک نئی جنگ کی خبر تو نہیں ہے؟

گزشتہ دنوں جے یو آئی کے سربراہ مولانا فضل الرحمن نے کالعدم تحریک لبیک کیخلاف لاہور میں یتیم خانہ چوک کو مسلسل کئی دنوں تک بند رکھنے پر مظاہرین کو منتشر کرنے کے لیےحکومت کی جانب سے کاروائی کرنے کے حوالے سے  پریس کانفرنس کے دوران جاتے جاتے یہ بات کہہ دی کہ ‏اس ملک میں اگر پی ٹی ایم جیسی انتہا پسند قوم پرست اور دہشت گرد جماعت پنپ سکتی ہے تو مذہبی جماعتیں کیوں نہیں ؟

مولانا فضل الرحمن کے اس بیان کے بعد پی ٹی ایم کے ممبر قومی اسمبلی محسن داوڑ ،پی ٹی ایم کے سربراہ منظور پشتین ،افراسیاب خٹک اور محمود خان اچکزئی سمیت دیگر رہنماوں نے شدید رد عمل کا اظہار کیا ۔اسکے ساتھ ساتھ سوشل میڈیا پر ابھی تک مولانا فضل ارحمن کےحمایت یافتہ  اور پی ٹی ایم کے حمایت یافتہ افراد کے درمیان لفظوں کی شدید جنگ جاری ہے ۔

پی ٹی ایم اور مولانا فضل الرحمن کے بیان کے حمایتوں کے درمیان سوشل میڈیا کی اس جنگ میں ایک دوسرے پر طرح طرح کے الزامات کا سلسلہ جاری ہے۔ کوئی فضل الرحمن پر ڈالروں کی خاطر پشتون قوم کو جہاد کے نام پر جنگ میں دھکیلنے کے الزامات لگا رہا ہے تو کوئی پی ٹی ایم کو پشتون قوم کی نئی نسل کو کسی اور کے ایما پر لسانیت کی جنگ میں دھکیلنے سمیت ہم جنس پرستی کو فروغ دینے اور پاکستان دشمنوں کے ایما پر پاکستان کو غیر مستحکم کرنے کے مشن پر عمل پیرا قرار دے رہا ہے ۔

سوشل میڈیا پر اپنی رائے کے اظہار میں کچھ افراد نے تو مولانا فضل الرحمن پر الزم عائد کرتے ہوئے کہا کہ مولانا فضل الرحمن نے  اسٹبلشمنٹ کے کہنے پر یہ  الفاظ ادا کیے اور یہ مولانا فضل الرحمن کی جانب سے اس تقریر کا رد عمل ہے جوکہ پی ٹی ایم کے ممبر قومی اسمبلی محسن داوڑ نے اسمبلی کے فلور پہ کی  تھی جس میں  محسن داوڑ نے کہا تھا کہ  طالبان دہشت گرد تھے دہشت گرد ہیں اور دہشت گرد رہینگے لیکن  طالبانوں کو بنانے والوں کو پارلیمنٹ کے سامنے پیش کرکے ان سے وضاحت طلب کرنی چائیے ۔

اس ساری صورتحال میں کون برحق ہے اور کون الزامات کا سہارہ لے کر اپنےحقیقی چہرے کو چھپانے کی کوشش کر رہا ہے اسکا فیصلہ تو آنے والا وقت ہی کرے گا لیکن مولانا فضل الرحمن کا پی ٹی ایم کو دہشت گرد جماعت کہنا بے مقصد نہیں ہے کیونکہ پختون بیلٹ اور افغان جنگ کے حوالے سے وسیع تجربہ رکھنے والے مولانا شیرانی نے پی ٹی ایم کے وجود میں آنے کے چند ماہ بعد ہی ایک پریس کانفرنس کے دوران ایک مقامی صحافی سے گفتگو کے دوران یہ بات کہی تھی کہ پختون قوم کی ایک نسل جہاد کے نام پر مذہبی جنگ کی نظر ہوئی اور ان پر دہشت گردی کا ٹھپہ لگ گیا جبکہ اب پی ٹی ایم ایک نسل کو قومیت کی بنیاد پر اسی راستے پر گامزن کرنے میں مصروف ہے ۔

مولانا شیرانی کے بعد مولانا فضل الرحمن کے منہ سے ان الفاظ کا نکلنا کہ پی ٹی ایم ایک دہشت گرد جماعت ہے پختون قوم کو وقت سے پہلے ایک نئی جنگ میں دھکیلنے کی خبر ہے ۔اس تمام صورتحال میں پختون قوم کے سیاسی رہنماوں سمیت علاقائی معززین اور معاشرے کے بااثر افراد کو وقت سے پہلے اس خطے کو نئی جنگ کی جانب دھکیلنے سے روکنے کے لیے کردار ادا کرنے کی اشد ضرورت ہے کیونکہ دہشت گردی کی جنگ میں بھی ان اقوام کا نقصان کم ہی ہوا جن اقوام کے مشران نے وقت سے پہلے اس جنگ سے نمٹنے کے لیے حکمت عملی مرتب کرلی۔ وہ اقوام آج تک جنگ کی اس چکی میں پس رہی ہیں جن پر حکمت عملی بناتے وقت  ڈر اور خوف غالب آگیا تھا  ۔

دنیا بھر میں کورونا وبا کی تیسری لہر سے نمٹنے کے لیے مختلف تدابیر پرعمل کرنے کا سلسلہ جاری ہے۔دنیا بھر کی طرح پاکستان میں بھی اس لہر سے بچنے کے لیے حکومت نے تعلیمی اداروں کو بند کردیا ۔مسجد میں وضو پر پابندی سمیت باجماعت نماز ادا کرنے کے دوران آپس میں فاصلہ رکھنے کے لیے حکومت نے ایس او پیز جاری کردیں ۔

بین الصوبائی اور بین الضلاع ٹرانسپورٹ پر ہفتے اور اتوار کے دن مکمل طور پر پابندی لگائی گئی ۔شادی حال کو بند کرنے کے ساتھ ساتھ مخصوص اوقات میں پروگرام کے انعقات کے لیے ایس او پیز جاری کر دی گئیں ۔لاک ڈاون کے لیے مختلف تجاویز زیر غور ہے اس حوالے سے مارکیٹوں کے لیے ایس او پیز اور کئی علاقوں میں ہفتے اور اتوار کو مارکیٹیں بند رکھنے کا فیصلہ کیا گیا ۔سرکاری دفاتر میں سٹاف کی حاضری میں کمی کردی گئی ۔

حکومت کے جانب سے کورونا سے بچنے کے لیے  اٹھائے گئے اقدامات  کی خلاف ورزی کرنے والے افراد کو مختلف سزائی بھی دی جا رہی ہیں ۔کورونا کی اس شدید لہر کے باوجود پی ٹی ایم نے وانا میں جلسہ کرنے کا فیصلہ کیا ۔اس جلسے کے لیے کئی ہفتوں سے کمپین بھی چلائی گئی لیکن ضلعی انتظامیہ نے ایس او پیز کی پامالی کی وجہ سے نہ تو کسی کو کوئی سزا دی اور نہ جلسہ روکنے کی کوشش کی اور آخر کار گزشتہ دنوں پی ٹی ایم نے جنوبی وزیرستان کے صدر مقام وانا میں ایک جلسہ کیا جس میں لوگوں کی ایک بڑی تعداد نے نہ صرف شرکت کی بالکہ حکومت کی جانب سے جاری کردہ کورونا ایس او پیز کی دھجیاں اڑائی گئیں ۔

پختونوں کو ذندگی دینے کا نعرہ لگانے والوں نے پختونوں کو کتنی ذندگیاں دی ہیں اور کتنی ذندگیاں چھینی ہیں یہ تو سب کو پتا ہے لیکن ریاست کے کردار پر اس جلسے نے کئی سوالات کھڑے کر دئیے ۔ضلع انتظامیہ کی خاموشی اور اس جلسے کے حوالے سے تماشائی کے کردار نے ریاست کی ذمہ داریوں پر کئی سوالات کھڑے کر دئیے ۔اگر کوئی پرائیویٹ سکول کا پرنسپل بچوں کا مستقبل سنوارنے کی خاطر سکول کی بندش کے اعلان پر عمل کرنے کے بجائے سکول کھلا رکھتا ہے تو اسکو جرمانے کرنے کے ساتھ ساتھ ایف آئی آر کا سامنا بھی کرنا پڑتا ہے ۔اگر کوئی ریڑھی والا اپنے بچوں کا پیٹ پالنے کے لیے کورونا ایس او پیز کی خلاف ورزی کرتا ہے تو اسکو بھی اذیت کا سامنا کرنا پڑتا ہے ۔اگر کوئی ڈرائیور ہفتے یا اتوار کے دن اپنے گھر کا چولہا جلانے کے لیے گاڑی کو سڑک پر نکالتا ہے تو اسکو ٹریفک پولیس ناقابل یقین چالان کے ساتھ ساتھ انکو حوالات کی سیر کرواتی ہے لیکن پی ٹی ایم نے سینکڑوں افراد کا مجمع جمع کرکے ضلعی انتظامیہ کے ناک تلے کورونا ایس او پیز کی دھجیاں اڑایں مگر نہ تو کسی کو جرمانا کیا گیا اور کسی کو ایف آئی آر کا سامنا کرنا پڑا۔

کورونا ایس اوپیزکی خلاف ورزی کرنے والی پی ٹی ایم قیادت کے ساتھ ساتھ ضلعی انتظامیہ خاموشی اختیار کرنے پر اس جرم میں برابر کی شریک ہے اسی لیے پی ٹی ایم قیادت کے ساتھ ساتھ ضلعی انتظامیہ کیخلاف کاروائی عمل میں لائی جائے تاکہ اگر کسی ریڑھی والے کورونا ایس او پیزکی خلاف ورزی  کے خلاف کاروائی عمل میں لائی جاتی ہے تو اسکو یہ شکوہ نہ ہو کہ کورونا کی آڑ میں مجھے حلال رزق کمانے سے روکا جا رہا ہے ۔

تحریر حیات اللہ محسود

جرگہ قبائلی روایات کا حصہ ہے جرگے  کو یہ اعزاز حاصل ہے کہ یہ انصاف کی فراہمی کا تیز ترین ذریعہ ہے کئی ایسے مسائل جنکوں حل کرنے پر عدالتوں میں سالوں سال لگ جاتے ہے وہی مسائل جرگے کے زریعے یا تو چند گھنٹوں میں حل ہوجاتے ہے یا پھر چند دنوں میں حل ہوجاتے ہیں ۔

جرگے کے زریعے فریقین کے درمیان فیصلے کرنے والے افراد کو مقامی زبان میں مرکزن کہتے ہیں جبکہ دوسرے الفاظ میں انکو ثالثین کہتے ہیں ۔قبائلی روایات میں ثالثین کا کردار ان افراد کو دیا جاتا تھا جن کی معاشرے میں دیانت داری ایمانتداری اور صاف گوئی کے حوالے سے ایک پہچان ہوتی تھی ۔قبائلی اضلاع میں طالبانائزیشن کے وجود میں آنے کے بعد دیگر رسم ورواج کی طرح جرگہ بھی مثاثر ہوا ۔ جرگے میں جو رہے سہے مثبت اثرات باقی تھے اسکا جنازہ عسکری آپریشن کے بعد یہاں کے چند نام نہاد مقامی سرکاری ملکان نے نکال دیا۔آہستہ آہستہ قبائلی رسم رواج کے اس اہم پہلو کو کاروبار میں تبدیل کر دیا گیا۔ جرگے میں نئی نئی رسومات کا اضافہ کرکے جرگے کو انصاف کی فراہمی کی بجائے کمائی کے زریعے میں تبدیل کردیا گیا اور یہ سلسلہ اسی طرح جاری رہا جسکی وجہ سے آج وہ جرگہ جسکو ایک زمانے میں انصاف کی فراہمی کا آسان ترین اور تیز ترین زریعہ تصور کیا جاتا تھا وہ لوٹ کھسوٹ،انصاف کی فراہم کی بجائے نا انصافی اور صلح کی بجائے لڑائی کا زریعہ تصور کیا جاتا ہے ۔

آج بھی کئی جرگے ایسے بھی ہوتے ہیں کہ جن میں انصاف کا بول بالا ہوتا ہے لیکن جرگے کو اتنا بدنام کیا گیا کہ انصاف کی خاطر ہونے والے جرگوں پر بھی کسی کو اعتماد نہیں ہوتا ۔لالچی ثالثین اور سول انتظامیہ کے ٹاوٹ نما نام نہاد ملکان کے ہاتھوں مسلسل کئی سالوں تک جرگہ نظام کی یرغمالی کی وجہ سے جرگے میں ایسی رسومات کو شامل کر دیا گیا جو کہ قبائلی جرگہ کا حصہ نہ تھیں ۔ان سرکاری ملکان نے سول انتظامیہ کے ساتھ ملکر اپنے چند روپے کی لالچ کی خاطر جرگے کے اس بہترین نظام کو خراب کر دیا جو یہاں کے رسم وراج کا حصہ ہونے کے ساتھ ساتھ یہاں کے لوگوں کے لیے انصاف کا ایک سستا اور تیز ترین زریعہ سمجھا جاتا تھا ۔

جہاں لالچ کی آمد ہوتی ہے وہاں سے انصاف چلاجات ہے اور یوں جرگہ نظام کے ساتھ بھی یہی ہوا۔نام نہاد ملکان نے جرگہ نظام میں لالچ کو بلا کر یہاں سے انصاف کا جنازہ ہی نکال دیا ۔خالوت، مزدوری اور نہ جانے کن کن ناموں کے زریعے جرگے کو کمائی کا ایک زریعہ بنادیا اور اپنی چند روپے کی لالچ کے خاطر قبائلی جرگےمیں ایسی رسومات کو شامل کر دیں کہ انصاف کا یہ آسان ترین زریعہ نا انصافیوں کے ساتھ ساتھ لالچ اور پیسہ کمانے کا زریعہ بن گیا ۔ہر معاشرہ میں لالچی افراد کی کمی نہیں ہوتی اسی طرح قبائلی اور بالخصوص جنوبی وزیرستان میں موجود وہ لوگ جنکی کمائی کا کوئی زریعہ نہیں تھا انھوں نے روایتی پگڑیاں خرید کر خود کو ثالثان کہلانے لگے ان لالچی افراد جن میں زندگی کے ہرشعبے سے تعلق رکھنے والے افراد شامل تھے نے جرگے کا رہا سہا ڈھانچہ بھی بگاڑ دیا ۔ آہستہ آہستہ ان لوگوں نے جرگے میں شامل ہونے سے کنارہ کشی اختیار کرلی جو لوگ اللہ کی رضا اور فریقین کے انصاف پر مبنی صلح کی نیت سے اکثر جرگوں کا حصہ ہوتے تھے۔

ہمارے روایتی جرگے کا یہ ایک اصول تھا کہ جن فریقین کے درمیان تنازعہ ہوتا تھا وہ دونوں فریقین تب تک ثالثان کا کردار ادا کرنے والے افراد کے لیئے باری باری  قیام وطعام کا بدوبست کرتے تھے جب تک وہ فیصلہ نہ سناتے  اور خالات اس وقت دیاجاتا تھا جب ثالثین فیصلہ سنادیتے وہ بھی فریقین اپنی استطاعت کے مطابق جتنا خالوت دیتے ثالثین اسکو بخوشی قبول کر لیتے ۔جن فیصلوں میں ثالثان کو یہ ڈر ہوتا کہ کہیں ایسا نہ ہو کہ فریقین دوران جرگہ کوئی غلط قدم اٹھائیں یا پھر فیصلہ سناتے وقت فیصلہ ماننے سے انکار کریں تو وہ فریقین سے جرگہ شروع کرنے سے پہلے ضمانت لیتے جسکو مقامی زبان میں شوینائی یا برآمتا کہا جاتا تھاضمانت کے طور پر بندوق جمع کرتے تھے اور جرگہ ختم ہونے کے بعد جب فیصلہ ہوجاتا تو یہ ضمانت متعلقہ افراد کو واپس کر دی جاتی تھی۔ جرگے میں شامل افراد ہر ممکن کوشش کرتے کہ تنازعہ کافیصلہ انصاف پر کرالیتے کیونکہ اگر ثالثین جرگہ ناانصافی پر کرتے تو علاقے میں ان کی ساکھ بری طرح متاثر ہوتی اور لوگ انکو برے الفاظوں میں یاد کرتے اور انکی ناانصافیوں کی مثالیں ہرجرگے میں دی جاتیں تھیں جسکی  وجہ سے بہت ہی کم عرصے میں یہ بات زبان عام ہوجاتی ۔

اسکے علاوہ اگر  ثالثین کو دو فریقین کے درمیان جرگے کرنے کے زریعے صلح کرانے میں ناکامی کا سامنا ہوجاتا تو یہ بھی ان ثالثین کے لیے بڑی عیب کی بات ہوتی اور خدا ناخواستہ اگر اس تنازعہ  کے باعث فریقین کے درمیان کوئی ناخوشگوار واقعہ رونما ہوجاتا تو معاشرے میں اسکی ذمہ داری بھی جرگے میں شامل ثالثان پر ڈال دی جاتی اور انکو اس ناخوشگوار واقعے کا قصور وار ٹھہراتے۔ یہی وجہ تھی کہ بہت انصاف پسند اور چیدہ چیدہ لوگ اس عمل سے وابستہ تھے اسکا مقصد صرف اللہ کی رضا اور علاقے میں اپنی بہترین ساکھ کو قائم رکھنا مقصود ہوتا تھا باقی اسکو کسی قسم کا لالچ نہیں ہوتا تھا کیونکہ دوران جرگہ انکے مختلف نخرے برداشت کرنے کے ساتھ ساتھ معاشرے میں بھی لوگ انکو عزت کی نگاہ سے دیکھتے تھے اور لوگ انکی باتوں پر اعتماد کیا کرتے تھے ۔

ایک نوجوان نے مجھے بتایا کہ گزشتہ تین سالوں سے ہمارا وزیرستان میں زمین کے ایک ٹکڑے پر تنازعہ چلا آرہا ہے پچاس لاکھ سے زائد خرچہ ہونے کے بعد اب تک تنازعہ کا حل تو دور کی بات اس تنازعہ کے فیصلے کے لیے ایک قدم تک بھی نہیں اٹھایا گیا دریافت کرنے پر انکا مزید کہنا تھا کہ پہلے ضمانت کے نام پر ہم سے ایک ایک لاکھ روپے لیے اسکے بعد پہلے جو ثالثین ضلعی انتظامیہ نے دئیے وہ آجاتے اور مہلت دیکر خالوت لے کر چلے جاتے یہ سلسلہ کئی مہنوں تک جاری رہا اور آخر کار لاکھوں روپے سمیٹنے کے بعد انھوں نے موقف اپنایا کہ یہ فیصلہ ہمارے بس کی بات نہیں ہے ہم تکیہ لیتے ہیں اور آپ لوگوں کے فیصلے کے لیے مزید تگڑے ثالثان کا انتخاب کرتے ہیں ۔اور یوں اس نے تکیہ لیا اور نئے ثالثان نے ہمارے ساتھ وہی کیا جو انھوں نے کیا آخر میں انکا بھی یہی جواب آیا کہ کہ ہم سے یہ فیصلہ نہیں ہورپارہا اس لیے شریعت کے رو سے ہی اس تنازعہ کا فیصلہ ممکن ہے ہم تکیہ لیتے ہیں آپ کا فیصلہ فلانے قاضی اور اسکے ساتھ دو وزیر ہونگے وہی کرینگے ۔قاضی جوکہ مدرسے سے قاضی کی ڈگری حاصل کرنے ساتھ ساتھ وہ مقامی روایات کو بھی جانتا ہو وہی قضاوت کرسکتا ہے جو کہ چیدہ چیدہ لوگ ہوتے ہیں ۔قاضی صاحبان کے نخرے اور انکے خرچے برداشت کرنے کے بعد آخر ایک فریق نے اٹھ کر اس پر اعتراض کر دیا اور فیصلہ کرنے سے پہلے ہی انکو معزول کر دیا یوں لاکھوں روپے اور ایک لمبہ عرصہ گزرنے کے باوجود آج بھی ہم اس مقام پر کھڑے ہیں جہاں سے آغاز کیا تھا۔

 ۔نوجوان کی داستان سننے کے بعد مجھے کئی ایسی باتیں سننے کوملیں جو کہ ہمارے روایتی جرگے کا ماضی میں حصہ نہیں تھیں اور لالچی ثالثین نے اپنے جیب گرم کرنے کے لیے انکو جرگے کا حصہ بنا دیا۔ پہلا تو ضمانت کے طور پر پیسوں کا جمع کرنا کیونکہ ہماری روایات میں یہ بات شامل تھی کہ ضمانت کے طور پر فریقین سے بندوق کو بطور ضمانت لیا جاتا اسکی وجہ یہ تھی کہ بندوق ہمیں ہر چیز سے ذیادہ عزیز اور قیمتی ہوتی تھی بندوق کو ضمانت میں اس لیے جمع کیا جاتا کہ فریق کسی بھی صورت انصاف پر مبنی فیصلہ ماننے سے انکار نہیں کر سکتا تھا کیونکہ اگر اسکی بندوق ضبط ہوجاتی تو یہ اسکے لیے مرجانے کے مترادف ہوتا اسی لیے بندوق کو بطور ضمانت دینے والا شخص ضمانت دیتے ہی ذہنی طور پر اس بات کے لیے تیار ہوجاتا کہ فیصلہ چاہے میرے حق میں ہو یا میرے خلاف بس اب میں نے فیصلہ ہی کرنا ہے۔ جب کوئی انسان ذہنی طور پر صلح کے لیے تیار ہوجاتا ہے تو وہ صلح آسانی سے ہوسکتی ہے اور بندوق کو بطور ضمانت جمع کرنا ہی فریق کو ذہنی طور پر صلح کرنے کے لیے تیار کرنا ہوتا تھا ۔ اب اس ضمانت کو پیسوں میں تبدیل کرنا صرف ایک روایت کو بنیاد بناکر پیسے بٹورنے کا زریعہ تو ہے مگر مسلے کے حل میں انکا کوئی کردار نہیں ہوتا کیونکہ ہمارے ہاں یہ بات مشہور ہے کہ پیسے آنی جانی چیزہیں اور پیسے انسان کماتا ہی اپنی عزت بچانے کے لیے ہے اسی لیے اگر بطور ضمانت جمع شدہ رقم ضبط بھی ہوجائے تو یہ کسی بھی فریق کے لیے کوئی عیب کی بات نہیں ہو گی۔ البتہ وہ اپنے پیسوں کو بچانے کے لیے مختلف حربے استعمال کریگا ناکہ صلح کے لیے ۔اب چونکہ وہ بندوقوں کا زمانہ نہیں رہا لیکن بندوق کے متبادل اور کوئی ایسی چیز اگر بطور ضمانت جمع کی جائے جس سے فریق ذہنی طور پر فیصلے کے لیے راضی ہوسکیں تو یہ بندوق کا بہترین متبادل ہوگا ناکہ پیسے جمع کرنا۔ ہمارے ہاں یہ بات مشہور ہے کہ جس فیصلے میں ضمانت جمع ہوجاتی ہے وہ فیصلہ آدھا ہوجاتا ہے ۔

دوسری بات جو اس نواجوان کی داستان میں سننے کو ملی وہ تھی تکیہ کیونکہ تکیہ کی ہمارے قبائلی جرگے میں اس سے پہلے کوئی حثیت نہیں تھی اور نہ تکیہ قبائلی جرگوں کا حصہ تھا ۔تکیہ کے معلومات کرنے پر معلوم ہوا کہ تکیہ کا مطلب یہ ہوتا ہے کہ جو ثالثین فیصلہ کرنے میں ناکام ہوجاتے ہیں اور وہ جرگے کے لیے نئے ثالثان کا انتخاب کرتے ہے تو نئے ثالثان کو خالوت کی شکل میں جتنی بھی رقم ادا کی جائے گی اتنی ہی رقم تکیہ اختیار کرنے والوں کو بھی دی جائے گی۔ ۔خالوت قبائلی جرگوں میں فیصلہ سنانے کے وقت دیاجاتا تھا لیکن اب لالچی ثالثان کی بدولت جب بھی نشست ہوتی ہے تب خالوت دیا جاتا ہے ۔

جرگوں میں یہ بگاڑ پیدا ہونے کے باوجود بھی آج بھی بے شمار ایسے لوگ ہیں جو کہ قبائلی اضلاع میں عدالتوں کے ہوتے ہوئے بھی جرگوں کے زرئعیے  فیصلہ کرنے کو ترجیح دیتے ہیں ۔جرگہ نظام مہنگا ضرور ہوا ہے لیکن آج بھی لوگ اس نظام پر اعتماد کرتے ہیں ایسی کئی مثالیں موجود ہیں کہ جرگے کے اس بگڑے ہوئے نظام کے باوجود بھی کئی ایسے فیصلے جو ہمارے یہاں کی عدالتیں نہ کر سکی اسکا فیصلہ جرگے کے زریعے ممکن ہوا ہے ۔جرگہ نظام میں بے شمار بگاڑ پیدا ہونے کے باوجود حکومت کو اگر آج بھی کوئی ایسا مسلہ درپیش ہوجاتا ہے جسکو حل کرنا چیلنج بن جاتا ہے تو حکومت بھی جرگہ کا سہارہ لیتی ہے ۔

جرگے نظام کو قبائلی اضلاع میں اگر فعال بنایاجائے تو یہاں پر بے شمار تنازعات جو کہ خونی تصادم میں تبدیل ہوجاتے ہیں اس پر باآسانی قابو پایا جا سکتا ہے۔ جرگہ نظام کو فعال بنانےکے بعد لالچی اور روایتی ملکان کو اسے دور رکھنے کی صورت میں ہی اس جرگے کے زریعے نہ صرف یہاں کے عوام کے مسائل حل ہونگے بالکہ لالچی اور مخصوص سرکاری ملکان کے کردار کے باعث جرگے کے نظام میں پیدا ہونے والا بگاڑ کا خاتمہ ہوسکے گا اور عوام کا اس پر اعتماد بحال ہو گا ۔جرگے نظام کو موثر بنانے کے لیے جرگے کو طاقتور بنانے کی ضرورت ہوگی اگر کوئی جرگہ کے فیصلے کو تسلیم نہ کرے تو اسکے خلاف کاروائی کرنے کے اختیارات اگر جرگہ کرنے والوں کے پاس ہوں تو انکے دیرپا مثبت نتائج ہوگے اور اگر جرگہ کٹھ پتلی اور بے اختیار ہوگا تو اسکے منفی نتائج ہونگے ۔جرگے کا جدید شکل ڈی آر سی ہے۔ بہترین اوصاف رکھنے والے اور جرگے نظام سے واقف افراد پر مشتمل اگر ڈی آر سی تشکیل دی جائے تو اسکے باعث کئی مسائل پر باآسانی قابو پایا جا سکے گا۔ ڈی آر سی کی تشکیل اور اسکو فعال بنانے کے لیے صوبائی حکومت اور بالخصوص آئی جی پولیس کو اس میں ذاتی دلچسپی لینی ہوگی۔العرض فعال ،بہترین اوصاف امیج رکھنے والے افراد پر مشتمل ڈی آر سی کے قیام میں ہی یہاں کے کئی مسائل اور بالخصوص زمینی تنازعات کا حل مزمر ہے ۔