پشاور:خیبرپختونخوا کے وزیر برائے سائنس وانفارمیشن ٹیکنالوجی عاطف خان نے متعلقہ حکام کو ضلع مردان میں جاری تعمیراتی منصوبوں کی مقررہ مدت میں تکمیل کی ہدایات جاری کرتے ہوئے کہا کہ منصوبوں میں بلا وجہ تاخیر کسی صورت برداشت نہیں کیا جائے گا۔
یہ ہدایات انہوں نے وزیراعلی کے مشیر برائے سی اینڈ ڈبلیو ریاض خان کے ہمراہ ضلع مردان میں چھوٹے و بڑے تمام منصوبوں پر تعمیراتی کام کے بارے میں پر پیش رفت بارے جائزہ اجلاس کی صدارت کرتے ہوئے دیں۔
اجلاس میں رکن صوبائی اسمبلی ظاہر شاہ طورو اور طفیل انجم کے علاؤہ سیکرٹری محکمہ سی اینڈ ڈبلیو سمیت دیگر متعلقہ حکام نے شرکت کی۔ اجلاس کو کیڈٹ کالج فار گرلز مردان، باچا خان میڈیکل کالج مردان اور ڈسٹرکٹ ہیڈ کوارٹر ہسپتال مردان کے علاؤہ دیگر منصوبوں پر تعمیراتی کام پر پیش رفت سے متعلق بریفنگ دی گئی۔
اجلاس کو بتایا گیا کہ گرلز کیڈٹ کالج کی اکیڈیمک بلاک، تین ہاسٹلز، میس اور ایڈمنسٹریٹیو بلاک پر جاری تعمیراتی کام آخری مراحل میں ہے اجلاس کو ڈسٹرکٹ ہیڈ کوارٹر ہسپتال میں جاری تعمیراتی منصوبوں کے علاؤہ باچا خان میڈیکل کالج مردان کی تعمیر کے علاؤہ ضلع میں دیگر مختلف منصوبوں پر پیشرفت بارے بھی آگاہ کیا گیا۔
اس موقع پر عاطف خان نے مختلف منصوبوں کے تعمیراتی کام پر سست روی پر متعلقہ حکام کی سرزنش کرتے ہوئے ھدایات دیں کہ تمام پراجیکٹس پر کام مقرر مدت میں مکمل کیا جائے اور تاخیر کی صورت میں متعلقہ افسران کیخلاف کارروائی کی جائے گی۔انہوں نے کہا کہ عوام کی فلاح و بہبود کے لئے شروع کردہ منصوبوں میں شفافیت اور معیاری کام کو بھی یقینی بنایا جائے تا کہ حکومت کی جانب سے شروع کردہ منصوبوں سے عوام بھر پور طریقے سے استفادہ حاصل کر سکیں۔
