ڈی جی آئی ایس پی آر نے پریس کانفرنس سے خطاب کرتے ہوئے کہا کہ کہ ارشد شریف کی موت سے متعلق حقائق کا ادراک انتہائی ضروری ہے۔ ڈی جی آئی ایس پی آر لیفٹیننٹ جنرل بابر افتخار نے مزید کہا کہ اس پریس کانفرنس سے متعلق وزیر اعظم پاکستان کو خصوصی طور پر آگاہ کیا گیا ہے اور یہ پریس کانفرنس اس لئے کی جارہی تاکہ ارشد شریف کے معاملے پر حقائق سب کے سامنے آسکیں۔
ارشد شریف کے واقعے پر جھوٹا بیانیہ بنایا گیا اور اس جھوٹے بیانیے کے ذریعے معاشرے میں غیر معمولی اضطراب کی صورتحال پیدا کرنے کی کوشش کی گئی۔
دکھ تکلیف کی اس گھڑی میں ہم سب ان کے لواحقین کے ساتھ برابر کے شریک ہیں۔ ارشد شریف کی وفات ایک اندوہناک واقعہ ہے وہ پاکستان کی صحافت کا ایک آئیکون تھے۔ سیاچن ہو، فوجی مشقیں، شمالی علاقہ جات، ارشد شریف کے پروگرام صحافتی دنیا میں ہمیشہ سامنے رکھے جائیں گے۔وہ ایک فوجی کے بیٹے اور شہید فوجی کے بھائی تھے۔ ارشد شریف نے سائفر کے معاملے پر بھی کئی پروگرامز کیے۔فوج اور شہیدوں کے بارے میں ان کے پروگرام میں درد ہمیشہ جھلکتا تھا۔
